Ein hadroddiad bwlch cyflog rhwng y rhywiau

Nid oes cyfnod cymharu uniongyrchol gan fod CDPS yn sefydliad cymharol newydd, a dyma ein blwyddyn gyntaf o adrodd.

Er nad yw’n ofynnol i CDPS adrodd ar ein bwlch cyflog rhwng y rhywiau, credwn ei bod yn bwysig gweithio yn yr agored, ac ymdrechu i hyrwyddo cynwysoldeb ym mhob agwedd.

Rydym yn cadarnhau bod y data am fwlch cyflog rhwng y rhywiau yn yr adroddiad hwn yn gywir, ac wedi’i lunio’n unol â’r canllawiau a gyhoeddwyd ar GOV.UK.

Nid diben y bwlch cyflog rhwng y rhywiau yw tynnu sylw at unrhyw anghydbwysedd o fewn cyflog cyfartal mewn rolau cyfartal, ond rhoi cymhariaeth o’r cydbwysedd rhwng dynion a menywod o fewn ein strwythur gradd gyflog fewnol.

Mae’r adroddiad hwn yn amlygu mai ein bwlch cyflog rhwng y rhywiau yw -20.68%.

Fel sefydliad rydym yn falch bod ein ffigurau ymhell islaw cyfartaledd y DU cyfan o 8.3% yn 2021/22, ond yn cydnabod bod angen i ni gadw cydbwysedd yn y dyfodol. 

Cyfanswm y bobl a gyflogwyd ym Mawrth 2022 oedd saith, gyda 71% yn fenywod.

Wrth adolygu’r cymarebau chwartel, mae menywod yn llenwi 100% o’r swyddi sy’n talu uchaf, 100% o’r swyddi sy’n talu isaf, a 50% o’r swyddi â chyflogau is i ganolig. 

Fel sefydliad rydym yn penodi ar sail teilyngdod ac rydym yn canolbwyntio ar y ddawn a’r sgiliau sydd eu hangen i gyflawni’r rôl.

Rydym yn sicrhau bod ein prosesau recriwtio yn dileu rhagfarn annheg. Rydym yn defnyddio cyfweliadau strwythuredig, gan rannu cwestiynau ag ymgeiswyr saith diwrnod cyn y cyfweliad, a phanel wedi’i rannu rhwng y rhywiau i sicrhau bod ymgeiswyr yn gallu gwneud y gorau o’u perfformiad.

Yn ystod ein proses recriwtio rydym yn cydnabod anghenion amrywiol y gwahanol aelodau o’n gweithlu, a’n hegwyddorion sylfaenol yw sicrhau bod cydraddoldeb, amrywiaeth, a chynhwysiant yn cael eu gwreiddio ar draws CDPS.

Mae’r bwlch cyflog cymedrig yn cael ei gyfrifo drwy adio cyflog fesul awr yr holl fenywod mewn sefydliad a’i rannu â nifer y menywod, gan wneud yr un swm ar gyfer y dynion, yna cymharu’r ddau ffigur.

Mae cyflog cymedrig dynion 20.68% yn is na menywod.

Mae’r bwlch cyflog canolrifol yn cael ei gyfrifo drwy ganfod yr union bwynt canol rhwng y fenyw ar y cyflog isaf ac uchaf mewn sefydliad, a’r gwryw sy’n derbyn y cyflog isaf ac uchaf, yna’n cymharu’r ddau ffigwr i gyfrifo’r gwahaniaeth mewn cyflogau. 

Mae cyflog canolrifol dynion 28.2% yn is na chyflogau menywod.

Chwartelau cyflog

Mae’r ganran uchel o staff benywaidd i wrywaidd yn ystumio’r gymhariaeth chwartel-i-chwartel.

Cymhareb y staff benywaidd i wrywod yw 5:2 ar gyfer y cwmni cyfan. Fodd bynnag, fel sefydliad mae menywod yn llenwi 100% o’r swyddi sy’n talu uchaf, 100% o’r swyddi sy’n talu isaf a 50% o’r swyddi sy’n talu’n is i ganolig.

Tabl yn dangos chwartelau tâl (%) Mawrth 2022: